054118_qamislo-nerinen-jinan

‘Kiryarên Tirkiyê yên derheqê jinan li dijî pîvan û nirxên mirovahiyê‘

Jinên herêma Cizîrê destdirêjiya li ser jinên Efrînê ji aliyê çete û leşkerên dewleta Tirk şermezar kirin û bang û li rêxistinên têkildarî kirin ku bêdeng nemînin û kiryarên Tirkiyê yên ne exlaqî teşhîr bikin.

Çete û leşkerên artêşa Tirk a dagirker binpêkirinên xwe yên derexlaqî yên li dijî sivîlên Efrînê didomîn. Ji bilî revandin û êşkencekirina sivîlan û xwestina fidiyê ji malatên wan û talankirina mal û milkên wan di demên dawî de revandin û destdirêjî û kuştina li ser jinan derket pêş.

Di 23‘ê Tebaxê de çeteyên koma Sutlan Murad a ser bi Tirkiyê ve, jina bi navê Eyşa Ebdulnasir a 20 a ji taxa Mehmûdiyê Zeydiyê tecawiz kirin, piştî ku 5 mîlyon ji malbata wê girtin ew berdan.

22‘ê Tebaxê jî dîmena Îsra Yûsif Xelîl a 19 sal ku serpêhatiya destdirêjiya li hemberî wê ji aliyê çeteyê bi navê Ebû Emşa ve dibêje li ser tevna civakî hatibû weşandin.

Endama Meclisa Zagonsaz a kantona Cizîrê Hediya Elî binpêkirinên çete û leşkerên artêşa Tirk ên li ser jinan li ser Efrînê bi tundî şermezar kir û anî ziman ku binpêkirinên artêşa Tirk a dagirker û çeteyên wê yên revandin û êşkencekirin û destdirêjiya li ser jinan û xwestina fidiyê li dijî hemû nirx û pîvanên mirovahiyê ne.

Seroka Buroya Jin a Desteya Niştimanî ya Erebî Xensa El-Hemûd jî bi navê jinên Ereb ên herêma Cizîrê kiryarên çete û leşkerên Tirk ên li ser jinan şermezar kir û bang li hemû jinan kirin ku li hemberî dagirkeran yekitiya xwe xurt bikin, da ku di demeke herî nêzîk de Efrînê rizgar bikin.

Endama Dîwana Meclisa Zagonsaz a Kantona Cizîrê Îlham Mitlî a ji pêkhateyê Suryan tundiya li ser jinan ji aliyê dagirkerên Efrînê ve şermezar kir û got armanca tundiyê şikandina îradeya jinê ye.

Îlham Mitlî bang li rêxistinên têkildarî mafê mirovan kir ku sînorekî ji binpêkirinên li ser jinan li Efrînê re deynin.

 

(ANHA)

Leave a Reply

Your email address will not be published. Required fields are marked *