Kargeha Vîna Jinan pêdiviyên zivistanê amade dike
Kargeha Vîna Jinan ku sala par ji bo amedekirina pêdiviyên zivistanê hatibû vekirin, ev mehek e dîsa dest bi xebatê kiriye.
Di kargehê de 10 endamên jin ên kantona Kobanê dixebitin, kargeh jinên ku pêwîstiya xwe bi kar heye, deriyê xwe jê re vedike û wan di kar de bi cih dike.
Bi taybet jinên ku xwendina wan tune ye û nikarin cihê xwe di tu saziyan de bigirin, dikarin cihê xwe di vê kargehê de bigirin û pêwîstiyên xwe yên jiyanî bi dest bixin.
Heta niha jinên kargehê gelek işe (pêdiviyên zivistanê) çêkirine, wekî dimsê firingiyan, firingiyên hişkkirî, fasuliyên hişk, nok, bazêla, yaprax, kundir û bacanên hişkkirî, mirebiya mişmişan û mirebiya kerezê, her wiha dê gelek işeyên din di demên pêş de çêkin.
Hesabgira Kargeha Vîna Jinan Şêrîn Hacî têkildarî xebata kargehê axivî û wiha got: “Me ev kar bi taybet ji bo jinên ku xwendina wan tune ye û nikarin di tu saziyan de kar bikin, vekir û em dixwazin hemû jin cihê xwe di nava vê xebatê de bigirin.”
Her wiha xebatkara bi navê Fatma Ehmed anî ziman ku xebata wan baş diçe û kêfa wan ji kar re tê û ew bi karê destê xwe pêwîstiyên xwe yên jiyanaî bi dest dixin.
Hêjayî gotinê ye ku piştî mehekê dê Desteya Jinan a Kantona Kobanê firoşgehekê veke û işeyên ku li kargehê tên amedekirin tê de bifiroşe.
