ÇalakîNûçe

Bi sedan mêr bi boneya Roja Têkoşîna li dijî Tundiya li ser Jinan li herêma Firatê ji bo piştgiriya jinan meşiyan

Mêr û endamên saziyên Rêveberiya Xweser, partiyên herêma Firatê tev li meşê bûn ku bi dirûşma “Li dijî her cure tundî û dagirkeriyê, jin, jiyan azadî” ji Qada Şehîd Egîd a Kobanê dest pê kiriye.

Meşvan heta Qada Jina Azad meşiyan. Li wir endama Desteya Rêveber a Partiya Yekitiya Demokratîk (PYD) Ehmed Xoce axivî û got: “Ev roj ji bo jinan gelek girîng e. Hegemonyaya desthilata baviksalar şikand. Dûre jin ber bi azadiyê û civaka azad ve meşiyan.”

Xoce diyar kir ku bi saya felsefeya Rêber Abdullah Ocalan ku girîngiyeke mezin da jinan, jin rizgar bûn û di encamê de tev li avakirina civakan bûn û parastina welatê xwe dikin û wiha domand: “Divê jin vê firsenda dîrokî ya ku Rêber Ocalan daye wan, bi kar bînin. Xwe, cewher û mafên xwe biparêzin.”

Her wiha Xoce destnîşan kir ku di pêvajoya têkoşîna heyî de, divê kar û xebatên dîtir bên kirin, divê mêr piştgiriya jinan bikin ji bo ku xwe ji qeydan xilas bikin û got: “Ji ber ku tenê bi azadiya jinan, em azad dibin. Em baş dizanin ku jin di aliyê fikrî, aborî û civakî de hatine çewisandin. Divê em tê bikoşin ta ku koletiya 5 hezar salan  têk bibin û ber bi azadiyê ve bimeşin.”

Piştî wê Koma Şehîd Yekta ya Navenda Çandê ya herêma Firatê şanoyek têkildarî tundiya li ser jinan pêşkêş kir.

Back to top button

Warning: Undefined array key "sessionIdVal" in /home/kongrastar/public_html/wp-content/themes/jannah/footer.php on line 27