‘Pawitişê urf û adetî pawitişê nasnameyî yo’

 Cinîya bi nameyê Werda Hewase ke xoza ra hêz gêna û sozê dewamê urf û adetî xo yê Kurdewar dana û vana: “Pawitişê urf û adetî pawitişê nasnameyî yo.”

Cinîya awankerdox Werda Hewasa 52 serrî, maya 8 domanan û dewa Ebû Tîna yê Til Temirî ra ya, bi destê xo tenûran viraznena û wina hem debara xo kena û hem zî urf û adetê xo pawena. Werdaye vana: “Ez bi ereqê mîyanê çimanê xo hem debara xo kena hem urf û adetê xo pawena. Ez do heta peynîya emrê xo seba urf û adetê xo xizmet bikerî.”

Werdaye da zanayîş ke bi 20 serre yo aye tenûran viraznena û va: “Ez viraştişê tenûran maya xo ra musaya. Nika yê dewe heme tenûran mi ra gênê. Ez bi ked û heskerdişêke pîl tenûran viraznena. Merdimê ke bajaran de manenê sey dewijan kultur û urf û adetê xo rê wayîr nêvejênê. Yê bajaran tewr zêde tesîrê teknîkê averşîyayîş de mendê. Çiqas teknîk aver şêro zî ganî merdimî wayîrê kultur û urf û adetê xo vejîyê.”

Werdaye arde ziwan ke kesê pereyê înan çinbê ke tenûran bigîrê aye hetkarîya înan zî kena û wina va: “Ez tenûranê xo tewr zêde herra sûre viraznena. Viraştişê tenûrêke reseno 3 rojan. Ez bi ereqê mîyanê çimanê xo hem debara xo kena û hem zî urf û adetê xo pawena. Ez do heta peynîya emrê xo seba urf û adetê xo xizmet bikerî. Waştişê mi o yo ke heme cinîyê Kurd urf û adetê xo rê wayîr vejîyê. Pawitişê adetî pawitişê nasnameyê yo.”