Kooperatîfa Yekbûn aboriya jinan geş dike
Piştî Şoreşa Rojava-Bakurê Sûriyeyê û di bin çavdêriya Kongreya Star de kooperatîfên taybet bo jinan li hemû herêm û bajarên Bakurê Sûriyeyê hatin avakirin.
Kooperetîfa Yekbûn yek ji wan kooperetîfan e. Beriya 3 mehan ji aliyê Kongreya Star ve hate avakirin. 4 jin bi 25 hezar lîreyên Sûriyeyê di kooperatîfê de şirîk in. Jin di kooperatîfê de xwarinên gelêrî û amadekariyên zivistanê çêdikin. Her çar jin ji saetên berbanga sibê heta saet 13:00’an dixebitin.
Endama Kooperetîfa Yekbûn Rebîa Umer destnîşan kir ku wan di destpêka kar de gelek astengî kişandine û wiha got: “Piştî 3 mehan em encama karê xwe wek malbat hildiberînin.”
Girêdayî armancên vekirina Kooperetîfa Yekbûn endama rêveber a koopratîfê Sewsen Elî got armanc ne tenê komkirina qezenca madî ye, lê belê xurtkirina têkiliyan di navbera jinan de, vegera jiyana hevpar, rêgirtina li ber keysbaziya bazirganan û ji bo jin debara xwe ya rojane pêk bînin. Di dawiyê de Sewsen bang li hemû jinan kir ku aboriya xwe xurt bikin.
(ANHA)
