Rêvebera Kongra Star Sozdar Cîhad (Şehnaz Omer) 10ˈê Çileya îsal li ser rêya Xana Serê ya bajarê Dêrikê di êrişa hewayî ya dewleta Tirk a dagirker de şehîd bûbû, îro bi merasîmeke girseyî hat oxirkirin.
Bi sedan şêniyan cenazeyê şehîd Sozdar ji Nexweşxaneya Wetenî ya li bajarê Dêrik wergirt û ber bi Pakrewangeha Şehîd Xebat ve bi rê ket.
Li pakrewangehê merasîmeke hat lidarxistin. Merasîm bi deqeyeke rêzgirtin dest pê kir. Piştre endama Meclisa Malbatên Şehîdan a Dêrikê Xedîce Îbo axivî û got: “Em ê xeta hevala xwe Sozdar û meşa wê ya azadî û serketin ji doza xwe re bidomînin. Şehîd Sozdar heya kêliya dawî ji bo rizgarkirina jinan ji hegemoniya pergala baviksalar têkoşîn kir û nirxên jiyana hevbeş di nav gelên herêmê de belav kir.”
Rêvebera Meclisa Kongra Star a Dêrikê Wefa Elî jî îşaret bi êrişên dewleta Tirk a dagirker ên li dijî jinan kir û diyar kir ku bi van êrişan hewl dide şoreşa Rojavayê Kurdistanê û Bakur û Rojhilatê Sûriyeyê ku bi şoreşa jinan tê naskirin têk bibe û destkeftiyên jinan ji holê rake.
Serokê Weqfeya Al El Beyt a kantona Cizîrê Sînan Seydûş li ser ked û mezinahiya şehîdan axivî û wiha domand: “Bi hevgirtina gelan û sekna li hemberî dagirkeriya Tirk û çeteyên wê em ê planên li ser herêmên me têk bibin.”
Piştî axaftinan wesîqeya şehîd Sozdar Cîhad hat xwendin û radestî malbata wê hat kirin.
Cenazeyê şehîd bi dirûşman hat definkirin.
