Komîteya Aborî ya Jinan hilberînên projeyên xwe daxistin sûkan

Komîteya Aborî ya Jinan a herêma Dêrikê ya kantona Qamişloyê, di demeke kin de gelek destkeftî bi dest xistin û projeyên xwe firehtir kirin ku gelek jin tê de dixebitin. Di vê dawiyê de hilberînên projeyên çandiniyê daxistin nava sûkan.

Komîteyê 7 hiktar pîvaz, 12 hiktar sîr, 3 hiktar bezalya, 2 hiktar baqil, 5 hiktar petat li gundên Kendal û Mele Merzê yên herêma Dêrikê çandin.

Beriya 8 mehan komîteyê dest bi projeyeke çandiniyê kir ku sebzeyên havîn û zivistanê biçîne. Ji bo wê 50 hiktar bi cureyên cuda mîna baqil, bezalya, pîvaz û sîr çandin. Her wiha petat jî çand ku cara yekemîn li herêmê tê çandin.

Komîteyî di mehekê de dest bi çinîna hilberînên bezalya, baqil û xes kir û daxist nava sûka Dêrikê.

Miqdara hilberîna bezalya mehane 18 ton û xes gihaşt 4 tonan. Heke pêwîstiya sûkên Dêrikê bi temamî hat dabînkirin, hilberîna zêde dê bişînin bajarên din.

Karker ku piraniya wan jin in bezalya, baqil û xes ji saetên sibehê ve û heta êvarê diçinin. Destheqa her yekê li gorî saetên kar di navbera 4 hezar û 5 hezar lîreyên Sûriyê de ye. Di projeyê de 100 karkerên jin kar dikin.

Berpirsa projeyê Wedha Mihemed got: “Armanca sereke ya projeyê, peydakirina derfetên kar e, pêkanîna rêgeza xwetêkirinê û zêdekirina hilberîna xwecihî ya herêmê ye. Her wiha em dixwazin keysbaziya bazirganan bişkînin li gel pêla bihabûnê ya li herêmê û pêwîstiya herêmê ji sebzeyên havîn û zivistanê peyda bikin.”

(şx)