Li ser banga Kongra Star, bi dehan jinên ji bajarê Holê yê kantona Cizîrê li ber meclisa bajêr kom bûn. Jinan wêneyên Rêber Abdullah Ocalan bilind kirin û dirûşmên ji bo azadiya wî ya fîzîkê qîr kirin.
Di çalakiyê de, endama Kongra Star Nûr Xelîl daxuyaniyek xwend. Di daxuniyaiyê de hat gotin: “Em azadiya fîzîkî ya Rêber Abdullah Ocalan dixwazin, ji ber ku ramana azad nayê girtin. Mafê hêviyê yek ji mafên yasayî û navneteweyî ye ku divê hemû girtî jê sûdê wergirin.”
Nûr Xelîl her wiha got: “Jinên li Bakur û Rojhilatê Sûriyeyê azadiya Rêber Abdullah Ocalan wekî mijarek mirovî û siyasî dibînin, ji ber ku ew sembola aştî, demokrasî û mafên jinan li herêmê ye. Tecrîda berdewam a li ser wî êrişek rasterast li ser nirxên edalet û wekheviyê ye ku wî ji bo wan şer kiriye.”
Di dawiya daxuyaniyê de Nûr Xelîl li ser navê jinên Holê bang li rêxistinên mafên mirovan û saziyên navneteweyî kir ku zextê li dewleta Tirkiyeyê bikin da ku erkên xwe yên yasayî bicîh bîne û azadiya fîzîkî ya Rêber Abdullah Ocalan bipejirîne.
Çalakî bi dirûşmên ku daxwaza azadiya fîzîkî ya Rêber Abdullah Ocalan dikin, bi dawî bû.
